CCXCVII.

1400, März 26. Kamenz.

Abt Johannes tritt die Gerichte zu Baitzen an seinen Voigt und Anwalt, die Brüder Reinzsch und Göbel ab.

Wir bruder Johannes von Breslaw von gotis gnaden und bebistlichis stulis vorsichtikeyt apt czu Kamencz bekennen offenbar in desim briffe allen, di en sehen adir horyn lesin, daz wir gancz und gar bevolen haben unser gewalt und macht obir daz gerichte czum Byczan, alle sachen, dy is antrete adir mochte angetretin, beyde rychtunge und ansproche richtig czumachen, unsern foyte, brudir Reyncz und brudir Gobiln, unsirn anwaldin, di offenbar bekennen und habn bekant vor uns, daz vor se unbetwungin und unbetrogin, sundir mit gutir vornumft und willen getretin synt di fromin knechte Mertyn Goltsmeyt von Paczkaw von sin wegyn und sinen geerbin, und Hannus syn vettir, der Bernhard Schulczyn son gewest isi, ouch von sinet wegyn und Petir Peczalt und Annen syner elichin frawin und Hannus frawen Annen son, Petir Peczauldis stifson, der Heynrich Schultis son gewest ist, und habin sich iczlichis besundern gancz und gar vorczegin und begebin an arg allir ansproch, allir vorderunge, allir anlangunge, di si gehabt habin und gehabin mochtin, se adir ere geerbin nu und czu ewegin czyten off adir an dem gerichte czum Byczan, dazselbe nymme anczulangin noch anczusprechin. Auch habin globt Petir Peczault mit Annen siner elichin frawen und mit en Hannus Heynrichz Schultis son, mit stetir und ganczer truwe vor Mathis, der ouch Heynrichz Schultis son gewest ist, der noch unmundyschz di czyt gewest ist, vor alle onesproch, de her an dem vorgenanten gerichte czum Byczan gehabin mag adir mochte czu ewegin czyten daz selbe gerichte nu und eweclich nymmer an czu langen, noch an czu sprechen mit rechte noch mit gewalt, czurocke geleyt alle teyding und potwerge. Dez bekentnosse czu eyner ewigen bestetegunge habe wir angehangyn unsir segil unsir eptye, daz geschen ist noch gotis geburt in dem vyrczenhundirsten iare am frytage vor Methevastin in unsirm clostir czu Kamencz. Do by sint gewest: brudir Georg unsir prior, der pfarrer von Monstirberg, Richinsteyn von Monstirberg und Clemens Osterspyl, Tirpicz, gesworne scheppin der stad Monstirberg und andir irbar lewte vil, di do by gewest synt.

Or. Perg. Das S. fehlt; von dem Pergamentstreifen nur ein Stück noch erhalten.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.